Ang pagbibigay galang sa ating kinagisnang bansa ay dapat hindi ikinukubli, maliit na bagay kung maituturing ang simpleng pagdalo sa flag ceremony araw-araw ngunit bakit tila iilan nalang ang kabataang dumadalo dito, at kung minsan ang paaralan pa ang minsanan lang kung magpanimula ng flag ceremony.
Hindi lingid sa ating kaalaman na habang tumatagal ay naibabaon natin sa limot ang ating pagkamakabayan dahil na rin siguro sa ating kaisipan na permanente na ang ating kalayaan at hindi na itong muli maaagaw sa atin ng mga dayuhan. Ngunit sa ginagawa nating paglimot ay pinapakita natin sa mga dayuhan na hindi ganap ang ating pagkamakabayan at anumang oras ay kaya nilang bawiin ang ating pagkakakilanlan. Sa simpleng pagbibigay galang sa ating watawat at mga simbolo ng pagka Pilipino ay waring itinataboy rin natin ang mga dayuhan na sakupin ang ating bansa dahil makikita nila kung gaano natin kamahal ang ating Inang bayan ngunit kung patuloy nating isasawalang bahala ang simpleng pagbibigay pugay sa ating watawat ay waring itinakwil natin ang sariling bansa.
Hindi mahirap maglaan ng tatlumpung minuto sa umaga upang sariwain natin ang ating pagkakakilanlan at pagbibigay respeto sa ating mga ninuno nag buong buhay nakipaglaban upang ating tamasahin ang kalayaan.
Halina’t ibalik natin ang sigla ng flag ceremony at gunitahin lahat ng dugo’t pawis na inalay nila sa ating Inang bayan. Simpleng pagbibigay pugay sa ating watawat ngunit malaking tulong upang panatilihin ang ating kalayaan!